વિનોદ વિહાર

ગુજરાતી ગદ્ય-પદ્ય સર્જનની આનંદ યાત્રા

Category Archives: દીપોત્સવી અંક

1248- નવા વર્ષને નવપ્રકાશિત કરીએ, હેપ્પી દિવાળી….ચાલો. ….ભવેન કચ્છી

ઘરની સફાઈ તો થઈ ગઈ પણ તમે જ્યાં પ્રત્યેક ક્ષણ વસો છો તે મનની સફાઈ કરી ખરી ?

આ જે દિવાળીનો પર્વ…ચાલો, આપણને નવા વર્ષમાં નવપ્રકાશિત, નવપલ્લવિત, નવસંચારિત અને નવપ્રેરિત નવા માનવી બનાવી શકે તેવા આ તારામંડળના કુમળા તેજ અને તણખાંમાંથી જીવન દ્રષ્ટિનો ઉજાસ પ્રાપ્ત કરીએ. 

મનના ઘરની ડિઝાઇન કેવી ? 

આપણે બંગલો, ડુપ્લેક્સ કે ફલેટમાં નથી રહેતા. આપણે આપણા મનમાં વસીએ છીએ. હા, તે જ આપણું કાયમનું સરનામું છે. ત્યાં કોઈ સ્કેવર ફીટ કે સ્કેવર યાર્ડનું માપ નથી. તે વિશાળ અને અનંત વ્યાપેલું છે. તમે ગમે તેટલા મોટા દિવાનખંડ, શયન કક્ષ, વરંડા, ગરાજ, બાથરૂમ, બગીચા અને સુશોભન સાથે રહેતા હો તો પણ તમને સુખની અનુભૂતિ તો જ થશે. જો મન રૂપી ઘર પારદર્શક, સાફ-સુથરૂ, દિવ્ય દ્રષ્ટિ સાથેનું હશે.

દિવાળીના તહેવાર પૂર્વે પ્રત્યેક ઘેર સફાઈ થતી હોય છે. ઘણા તો એ હદે મનોબીમાર હોય છે કે રોજેરોજ ઘર, કપડા, વાસણને ચમકાવે. પલંગની ચાદર પર એક કરચલી કે જમીન કે ફર્નિચર પર ધૂણની રજકણ સુદ્ધા ચલાવી ના લે. આખો દિવસ આ સફાઈ, ધોલાઇમાં જ આવી ચિવટ બતાવતાં પૂરો કરી દે. જ્યારે પુરૂષો તેના કબાટ, ફાઈલ, પાસબુક, ડાયરીમાં આવી કાળજી બતાવતાં વર્ષ પૂરું કરે છે.

પણ આપણા મનની અસ્તવ્યસ્તતા અંગે ક્યારેય વિચારતા જ નથી હોતા. મનના એક ખૂણામાં સતત ઇર્ષા સળવળાટ કરે છે. બીજા ખૂણામાં વ્યક્તિઓ અને સમાજ તરફથી અપેક્ષાઓ ઉધઇની જેમ મનને ફોલી ખાય છે. કેટલીયે ખંધાઇ અને ચાલાકી આપણા મનના કક્ષની શેતરંજી હેઠળ આપણે છુપાવીને ફરતા હોઇએ છીએ. 

આપણા મનના કક્ષની જમીન પર વ્યર્થ ચિંતા, નકારાત્મકતા અને બીજા સાથેની તુલના ઠેર ઠેર વિખરાયેલી પડી છે. આપણા  મનના ઘરની શીશીઓમાં ગુરૂતાગ્રંથિ લીક થતી હોય છે. મોહ, લોભ, ક્રોધથી વાસણો ઉકળીને ઉભરાઇ રહ્યા છે. જૂના પૂર્વગ્રહોના વાસણો કાટ ખાઈ ચૂક્યા છે. 

દિવાળી નિમિત્તે ચાલો, આ મનના ઘરની સફાઈ કરીએ. મન છે તો જ દુનિયા સ્વર્ગ છે કે નર્ક છે. એટલે જ ‘મન મંદિર’ શબ્દનું પ્રયોજન થાય છે. પણ આ મનના ઘરની સફાઈની એક ખાસિયત પણ છે. તે તમારા વતી બીજા કોઈ કે નોકર સાફ કરી આપી શકે તેમ નથી. તે તમારે જ સાફ કરવું પડે. તો નવા વર્ષનો સંકલ્પ કરીએ કે તન દુરસ્ત અને મન દુરસ્ત રહીએ.

બોક્સિંગની રમત

જીવન બોકસિંગની રમત જેવી છે… તમે જ્યારે હરિફના બોક્સિંગ પંચથી અધમૂઆ થઇ … જમીન પર ચત્તાપાટ પડી જાવ છો ત્યારે રેફરી તમને પરાજીત જાહેર નથી કરતો પણ તમે જ્યારે જમીન પરથી ઉભા થવાની ના પાડો છો ત્યારે તમને પરાજીત જાહેર કરે છે.

પાણીમાંથી છાસ બને ?

પાણીને ગમે તેટલી વલોવશો તો પણ તેમાંથી છાશ ના જ બને. કાંટાને ગમે તેટલું પાણી પીવડાવશો તો પણ ગુલાબ નહીં ઉગે કોઇની 

પ્રકૃતિ સ્વીકારો. તેની જાતને બદલવા માંગતો વ્યક્તિ પોતે ઇચ્છશે તો જ તે બદલાઈ શકશે પણ તમે તે માટે તમારો વ્યર્થ સમય ન ખર્ચો…. બીજ સ્વયં ફૂટતું હોય છે.

સ્વભાવનું મેનેજમેન્ટ

છીએ એના કરતા

ઓછા દુ:ખી થવાની કળા

…અને……

હોઇએ એના કરતા

વધુ સુખી હોવાની અનુભૂતિ

…એટલે…..

”સ્વભાવનું મેનેજમેન્ટ”

ઓશોવાણી

એક ઘરમાં કેટલાયે વર્ષોથી એક ગિટાર ધૂળ ખાતુ પડી રહ્યું હતું. બાપ-દાદાના જમાનાના ઘણા ઘરો એવા હોય છે જ્યાં વર્ષોથી કોઈ ચીજ એમને એમ જ પડી હોય બસ તે જ હાલ ગિટારના હતા. ભૂલથી કોઈ બાળક તેના તાર છેડે અને અવાજ કરે તો ઘરના સભ્યો અકળાઇને કહેતા કે આ ઘોંઘાટ બંધ કર. કોઈ વખત એવું પણ બનતું કે ઘરમાં ફરતી બિલાડી છલાંગ મારે અને ગિટાર પડી જાય તો રાત્રે બધા ડરના માર્યા ઊંઘમાંથી ઊઠી પણ જતા. 

હવે આ ગિટાર ઘરના સભ્યોને ઉપદ્રવ સમાન અને ઘરની શોભા બગાડનાર લાગતી હતી. ઘરના સભ્યોએ નક્કી કર્યું કે આમ પણ નકામી, ખલેલ પહોંચાડતી, ધૂળ ખાતી ગિટારને ફેંકી દઇએ. તેઓએ ઘર નજીકના ઉકરડામાં તે ગિટારને તુચ્છ ભાવ સાથે ફેંકી દીધી. 

હજુ તો ઘરના સભ્યોએ ગિટાર ફેંકી જ હશે ત્યાં ઉકરડા પાસેથી પસાર થઈ રહેલ ભિખારીએ તે ગિટાર લઈ લીધી. તેણે તેની સફાઈ કરી. તારને ઠીકઠાક કર્યા. તેણે તારનો ઝણઝણાટ આંગળીઓ ફેરવીને શરૂ કર્યો. રસ્તાના નાકે બેસીને તે એવી કર્ણપ્રિય રીતે ગિટાર વગાડતો હતો કે રસ્તા પરથી પસાર થતા રાહગીરો તેને સાંભળવા થંભી જતા, કમાણી તો થઈ જ પણ યશ, કિર્તિ અને કરારો પણ થયા.

હવે ઘરના જે સભ્યો હતા તેઓને લાગ્યું કે આ તો એ જ ગિટાર જે વર્ષોથી ધૂળ ખાતી હતી, પજવતી હતી એને ઉકરડાને હવાલે કરેલી. તેઓ તે ભિખારી પાસે ગયા. જો કે હવે તે ભિખારી નહતો રહ્યો. ઘરના સભ્યોએ કહ્યું કે, ”લાવ આ ગિટાર તો અમારી છે. તું તો જાણે જ છે કે અમે તેને અમારા ઘરની સામેના ઉકરડામાં ફેંકી હતી.”

ભિખારીએ મર્મવેધ નિવેદન કર્યું કે ‘ગિટાર એની છે જેને વગાડતા આવડે છે જે તેનું કામણ અને મહત્તા સમજે છે. તમે ગિટાર ઘરે લઈ જશો તો ફરી તમને તે ઘરમાં પછી ભંગારને સ્થાન આપ્યું તેમ લાગશે. તમારી ઘરની જગા રોકનારું જણાશે. તમારી શાંતિમાં ખલેલ પહોંચાડશે’ ભિખારી ઉમેરે છે ‘કે મારા વ્હાલા સજ્જનો તમને ખબર છે આ જ ગિટાર તમને વગાડતા આવડે તો તમને ગહરી શાંતિની અનુભૂતિ પણ કરાવી શકે તેમ છે. બધુ જ વગાડવા પર નિર્ભર કરે છે.’

જીવન પણ એક ગિટાર છે. પણ આ જીવનની ગિટાર કહો કે વીણા કહો તેને વગાડતા બહુ ઓછા લોકોને આવડે છે. આ જ કારણે આપણને તે ગિટાર ભંગાર, હેતુહિન, શાંતિ માટેની બાધારૂપ અને બોજ સમાન  લાગે છે. આપણે જીવનને બગીચાની જગાએ ઉકરડાને હવાલે કરી દઇએ છીએ.

જેને જીવન જીવતા આવડે છે તેની પ્રેરણા લેવાની જગાએ ઇર્ષા કરીએ છીએ. આપણે એવા અજ્ઞાાનમાં રાચીને ફરી ફેંકી દીધેલી ગિટારને મેળવવા જઇએ છીએ જાણે ગિટારમાં સુખ સમાયેલું છે. ના ગિટારમાં નહીં તેને વગાડવામાં, તેના તારને છેડવામાં, લયબદ્ધ કરીને લીન થવામાં જ દિવ્ય સુખ છૂપાયેલું છે. જીવન અને મનરૂપી ગિટાર અને તેના તાર બંને તમારા હાથમાં છે.

 ધૂળ ખંખેરો, તેને ઓળખો, શાંતિના સ્ત્રોતને જ અશાંતિના સ્ત્રોત તરીકે જોવાનું અજ્ઞાાન ત્યજો.

વકીલની મજા

માણસ પોતાની ભૂલો માટે

ખૂબ સરસ ‘વકીલ’ બને છે.

જ્યારે

બીજાની ભૂલો પર

સીધો ”જજ” બની જાય છે.

પૂર્ણવિરામનું મહત્વ 

પકડો, મત જાને દો.

પકડો મત, જાને દો

ઉપરની બે લીટી સરખી છે માત્ર પૂર્ણવિરામ આમ તેમ થઈ જવાથી દુ:ખી થવાનું અને સુખી થવાનું કારણ સમજાઇ જશે !?

કિસ્મત

જીવન કિસ્મતથી ચાલે છે સાહેબ,

એકલા મગજથી ચાલતુ હોત તો

અકબર નહિં બિરબલ રાજા હોત.

અંગત કોણ ?

આપણું અશ્રુ વિનાનુ રૂદન સમજી શકે એ જ આપણો અંગત !!!

કેમ છો કહેનારા તો હજાર મળશે પણ કેમ ઉદાસ છો કહેનારા કોઈ અંગત જ મળશે.

‘કુલી’ની ભૂમિકા

અમિતાભ બચ્ચન અભિનિત ફિલ્મ ‘કુલી’ના ગીતની પંક્તિ

”સારી દુનિયા કા બોજ હમ ઉઠાતે હૈ,

લોગ આતે હૈ લોગ જાતે હૈ

હમ યહાં પે ખડે રહ જાતે હેં”

આ પંક્તિ રેલવે સ્ટેશન પર જીવન ગુજારતા ‘કુલી’ની છે.

આપણું પણ કંઇક આવું જ નથી…?

વર્ષો આવતા અને જતા રહે છે આપણે, આપણો સ્વભાવ, આદતો, પ્રકૃતિ અને અહંકાર હજુ ઠેરના ઠેર છે. સમય વીત્યો છે ચહેરો અને કદ કાઠી બદલાઈ છે આપણે તો એના એ જ રહ્યા. જીવનના સીમકાર્ડમાં પણ પ્લાન બદલીએ.

આધુનિક ‘પંચ’ તંત્ર

દિવાળીના તહેવાર નિમિત્તે હળવી શૈલીમાં પણ બોધ લઈએ.

પહેલી વાત : દરેક માણસ પાનકાર્ડ અને આધાર કાર્ડમાં દેખાય છે તેટલો ખરાબ નથી હોતો.

બીજી વાત : દરેક માણસ તેની પત્ની સમજે છે તેટલો ખરાબ નથી હોતો અને એની મા (માતા) સમજે છે એટલો સારો પણ નથી હોતો.

ત્રીજી વાત : દરેક માણસ એમ ઇચ્છે છે કે તેની પત્ની મિસ યુનિવર્સ જેવી દેખાય  અને ઘરમાં કામ મણિબેન જેવું કરે.

ચોથી વાત : દરેક પત્ની એવું ઇચ્છે છે કે તેનો પતિ અંબાણી જેટલું કમાય અને વ્યવહાર-વર્તન મનમોહનસિંઘ જેવું કરે.

પાંચમી વાત : નસીબ તો મોદી જેવું હોવું જોઈએ. સવાલ પૂછવા વિપક્ષમાં કોઈ નેતા નહીં અને ઘરમાં — નહીં.

કયું વરુ જીતશે ?

એક વૃદ્ધ તેના પૌત્રને વાર્તા કહી રહ્યા હતા

”મારા લાડલા, આપણા મનમાં બે વરૂઓ વચ્ચે જોરદાર લડાઈ ચાલતી રહેતી હોય છે. જેમાંથી એક વરુ ખૂબ જ ખૂંખાર, ઝેરીલું, ક્રોધથી ભરેલું છે. જેને આપણે ઇર્ષા, લઘુગ્રંથિ, અહંકાર તરીકે ઓળખી શકીએ… અને બીજું વરૂ સૌમ્ય, શાંત, ઉમદા, ઉદાર, આશાવાદી, દયાળુ અને સત્યપ્રેમી છે. બંને વરૂ એકબીજાને પછાડવા એકબીજા પર હાવી થવા (લડાઇ-સંઘર્ષ) કરતા રહે છે. બંને ભારે તાકતવર પણ છે.”

દાદાનું વાર્તા કથન જારી જ હતુ ત્યાં પૌત્રએ પૂછી કાઢ્યું કે ”દાદા, બેમાંથી ક્યું વરૂ જીતે છે ?” દાદાએ પૌત્રમાં વિચારવાની શક્તિ પ્રબળ બને તે રીતે ઉત્તર આપ્યો કે ‘તું જે વરૂને ખોરાક આપીને તગડુ બનાવીશ,  તે વરૂ જીતશે.’

છેલ્લી બે-ત્રણ પંક્તિનું અંગ્રેજી :

The boy thought and asked.

” Grand Father, Which Wolfwins ?”

The old man quitely replied

“The one you feed.”

…નવા વર્ષમાં આવી પ્રેરક વાતો આચરણમાં મુકી શકીએ તેવી શુભેચ્છા.

સૌજન્ય-સાભાર ..

વિવિધા .. ગુ.સ… ભવેન કચ્છી 

સૌજન્ય- શ્રી વિપુલ દેસાઈ … સુરતી ઊંધિયું 

CLICK FOLLOWING LINK FOR AUDIO

સુખી થવાના દીવાળીના પાંચ દીવસો-જય વસાવડા

Diwali Greetings-1

1118 -દિવાળી એટલે તિમિરથી તેજ તરફ ગતી કરવાનું પર્વ …..દીપોત્સવી અંક ..

 

દિવાળી યા દીપાવલી એ હિન્દુ ધર્મમાં ઘણાં વર્ષોથી ઉત્સાહથી મનાતો આવતો એક મહત્વપૂર્ણ લોક તહેવાર છે .

વાઘ બારશથી શરુ કરી ધનતેરશ, કાળી ચૌદસ , દિવાળી , બેસતું -નવું વર્ષ, ભાઈ બીજ,લાભ પાંચમ સુધીના દિવસો સુધી ચાલતો લોક ઉત્સવ અને આનંદનું પર્વ એટલે દીપોત્સવી પર્વ.અમાસના અંધકારમાં શરુ થતું દીપોત્સવી પર્વ એ તિમિરથી તેજ તરફ ગતી કરવાનું પર્વ છે .

દિવાળી પર્વ વિષે જાણીતા કવિ શ્રી અનીલ ચાવડાની મને ગમતી આ રચના એમના આભાર સાથે માણીએ .

લ્યો આવી ગઈ દિવાળી………– અનિલ ચાવડા

લ્યો આવી ગઈ દિવાળી દર વર્ષે આવે તેમ,
આ વખતે તો સ્વયં પ્રગટીએ ચલો દીવાની જેમ.

 

ઉદાસીઓના ફટાકડાઓ
ઝટપટ ફોડી દઈને,
ચહેરા ઉપર ફૂલઝડી સમ
ઝરતું સ્મિત લઈને;
કોઈ પણ કારણ વિના જ કરીએ એકમેકને પ્રેમ…
આ વખતે તો સ્વયં પ્રગટીએ ચલો દીવાની જેમ.

 

સૌની ભીતર પડ્યો હોય છે
એક ચમકતો હીરો,
ચલો શોધીએ ભીતર જઈને
ખુદની તેજ-લકીરો;
ભીતર ભર્યું જ છે અજવાળું ના ઝળહળીએ કેમ?
આ વખતે તો સ્વયં પ્રગટીએ ચલો દીવાની જેમ.

– અનિલ ચાવડા

દિવાળી પર્વ અંગે મેં અગાઉ લખ્યું હતું એમ દિવાળી આવે એટલે સાપ ગયા અને લીસોટા રહ્યા એ કથન મુજબ ચીલા ચાલુ રીતે એને ઉજવીએ એ પુરતું નથી.દિવાળીમાં ઓછા નશીબદાર માણસો પ્રત્યે તમારામાં હમદર્દી ,લાગણી કે સંવેદના અને પ્રેમ જો જાગે તો એ સાચી દિવાળીની ઉજવણી કહેવાય.

જે લોકો એમના જીવનની સફરમાં એકલા પડી ગયા છે, ભટકી રહ્યા છે એમની સાથે પ્રેમથી વાત કરીએ,એમની આંખોની ઉદાસી દુર કરી એમની આંખોમાં ખુશીની ચમક ભરીએ.જે લોકો એમના હૃદયમાં વરસો જુના ઘાવ લઈને ફરે છે એમને અહમને દુર કરીને મળીને એમને શેની પીડા સતાવે છે એ સમજી લઈએ અને દિવાળી –બેસતા વર્ષના આ તહેવારોમાં એમની સાથેની કોઈ પણ પ્રકારની ગેર સમજ હોય તો દુર કરવા પ્રયત્ન કરીએ તો કેવું !

જેમણે તમને એમની જાતથી વધુ ચાહ્યા છે એવાં મા-બાપ કે અન્ય વડીલોને આદરથી નમન કરી એમનો ચરણ સ્પર્શ કરી દિવાળીમાં એમના આશીર્વાદ પામીએ તો ખરી દિવાળી-નવું વર્ષ ઉજવ્યું કહેવાશે.

સૌથી વધુ તો દિવાળીમાં બહાર અનેક દીવડાઓ પ્રગટાવી એનો પ્રકાશ જોઇને તમે રાજી થાઓ એ પુરતું નથી.તમારા અંતરમાં પડેલું અજ્ઞાનનું અંધારું દુર કરી ત્યાં જ્ઞાનનો દીપક જલાવી એના સાત્વિક પ્રકાશથી તમે ભીતરમાં ના ઝળહળો ત્યાં સુધી ખરી દિવાળી ઉજવી ના કહેવાય.

ઓશોએ પણ કહ્યું છે કે ”દિવાળીનો દીપક અને એનો બહારનો પ્રકાશ કેટલો મનોહર લાગે છે !પરંતુ મનુષ્યની અંદર પડેલું અંધારું એ દુર કરી શકતો નથી !ભીતરમાં ધ્યાનની રોશની જો પ્રગટે તો જિંદગીનો હરેક દિવસ દિવાળી, દિવાળી જ છે.”

આ સંદર્ભમાં દિવાળી વિષે હ્યુસ્ટન નિવાસી શ્રી ચીમનભાઈ પટેલએ ઈ-મેલમાં મોકલેલ અખાના ચાબખાઓની યાદ અપાવતી એમની આ કટાક્ષ રચનાને પણ સાભાર માણીએ.

દિવાળી!

કંઈ દિવાળીએા આવીને ગઈ !

સાપ ગયા ને લિસોટા રહ્યા ભઈ!

કંઈ દિવાળીએા આવીને ગઈ!

 

સાફ કરે સહું પોતાના ઘર

દિવો પ્રગટાવે અંધકાર પર

કપડાં સારા પહેરીને સૌ ફરે

બને વાનગીઓ સારી ઘરે ઘરે!

દિલની સાફસુફી કરવાની રહી,

કંઈ દિવાળીએા આવીને ગઈ!

 

પૂજન કરીને મેળવવું છે સુખ

દેવ દર્શનથી દૂર કરવું છે દુઃખ

મંદિરમાં જઈને પ્રદિક્ષણા ફરે

ભાથુ ભાવીનું આમ સૌ ભરે.

કૃપા પ્રભુની હજુ નથી રે થઈ,

કંઈ દિવાળીએા આવીને ગઈ!

 

સાફ કરે સૌ અંદરના ઘર

રાખે અમિ દ્રષ્ટિ સૌની પર

પ્રેમ પૂજન કરી મેળવે સુખ

દૂર કરે જે દુઃખીએાનું દુઃખ

શાંતિ ઘરની સૌની લૂંટાઈ રહી,

કંઈ દિવાળીએા આવીને ગઈ!

 

કે’વા જોઈએ ‘ચમન’ને સાચું

લાગે ભલે કોઈને કડવું ને ખાટું

હરિફાઈ ચાલી છે મંદિરોમાં જયાં

વાનગીઓ અનેક અન્નકૂટમાં ત્યાં!

ભગવાન ભાવનાનો ભૂખ્યો ભઈ!

કંઈ દિવાળીએા આવીને ગઈ!

૦ ચીમન પટેલ ‘ચમન’

 

દિવાળી પર એક ચિંતનાત્મક લેખ… સૌજન્ય/સાભાર  … રીડ ગુજરાતી.કોમ

દિવાળી એટલે…   [ચિંતનાત્મક]  …  દિનકર જોષી

વાચક મિત્રો,

ગત સંવત વર્ષ દરમ્યાન આપ સૌએ આપેલ સહકાર અને પ્રોત્સાહન બદલ આપનો દિલથી આભાર માનું છું . નવા વરસે પણ એવો જ સહકાર મળતો રહેશે એવી આશા રાખું છું.

વિનોદ વિહારના સૌ વાચક મિત્રોને શુભ દિપાવલી અને નવા વર્ષે પ્રભુની કૃપાના પાત્ર બનો એવી હાર્દિક શુભ કામનાઓ સહીત-

દીપાવલી અભિનંદન …..નુતન વર્ષાભિનંદન 

સાલ મુબારક

અંતે મારી દિવાળીની હાઈકુ રચનાઓ ….

પ્રિય  જનોને 
દિવાળી,નવું વર્ષ,
મુબારક હો.
=====
જાતે મહેંકો,
મહેંક ફેલાવો જગે,
દરેક વરસે,
======
દિવાળી શીખ
અંધકાર હટાવો
પ્રકાશ લાવો
=====
નવા વરસે
નવા થઈએ, જુના
કેમ રહીએ !

=====

દિવાળી ,નવું 

વર્ષ, કેલેન્ડરની 

કમાલ માત્ર  

વિનોદ પટેલ,સંપાદક, વિનોદવિહાર

( 804 ) દીપોત્સવી પર્વ ….તિમિરથી તેજ તરફ ગતી કરવાનું પર્વ ….

DIWALI-VRP-FINAL

દીપાવલી પર્વ એટલે …

વાઘ બારશ ,ધનતેરશ, કાળી ચૌદસ , દિવાળી , બેસતું -નવું વર્ષ, ભાઈ બીજ,

લાભ પાંચમ સુધીના દિવસો સુધી ચાલતો લોક ઉત્સવ અને આનંદનું પર્વ.

આજથી શરૂ થતાં દિવાળીનાં દરેક પર્વ માટે આપને હાર્દિક શુભેચ્છાઓ .

પરમ કૃપાળુ પરમાત્મા આપને અને આપનાં પરિવાર જનોને

સુખ,શાંતિ,સમૃધ્ધિ,ઐશ્વર્ય અને તંદુરસ્તી અર્પે એ જ શુભકામનાઓ છે .

‘સર્વેપિ સુખીનો સન્તુ
સર્વે સન્તુ નિરામયાઃ।
સર્વે ભદ્રાણિ પશ્યન્તુ
મા કશ્ચિદ્ દુઃખમાપ્નુંયાત।।’’

(સર્વ જનો સુખી થાઓ. સૌ કોઈ નિરોગી રહો. સૌનું કલ્યાણ થાઓ અને કોઈ પણ વ્યક્તિ દુઃખી ન રહે, એ જ શુભકામના.)

“તમસો મા જ્યોતિર્ગમય”

નવા વર્ષ ની મારી અભિલાષા ..મારી એક સ્વ-રચના

Dipak-animation

એક સુરજ થવાનાં નથી મને કોઈ શમણાં,

માટીના મારા કોડીયામાં તેલ-વાટ પેટાવી,

અંધારાં ઉલેચતો ઘરદીવડો થવાનું મને ગમે .

સંસાર સાગરના તોફાનોમાં મારી જીવન નૌકાને,

સ્થિર રાખી સુપેરે હંકારવાની કૃપા કરવા માટે,

દીન દયાળુ પ્રભુનો આભાર માનવાનું મને ગમે.

આ જીવન મહોત્સવની હર પળ મોજથી માણીને,

જીવનને જોશથી  જીવી જવાનું મને બહું જ ગમે.

વિનોદ પટેલ

પ્રેમળ જ્યોતિ…પ્રાર્થના ….નરસિંહરાવ દિવેટિયા

કવી સ્વ.નરસિંહરાવ દિવેટિયા દિવેટિયા રચિત નીચેની પ્રાર્થના

મને મારા વિદ્યાર્થી કાળથી બહુ ગમે છે.

સાબરમતી આશ્રમમાં પૂજ્ય મહાત્મા ગાંધીના સાન્નિધ્યમાં મથુરાબહેન ખરેના

સ્વરે આ પ્રાર્થના અવાર નવાર ગવાતી હતી.

પ્રેમળ જ્યોતિ

પ્રેમળ જ્યોતિ તારો દાખવી મુજ જીવનપંથ ઉજાળ

દૂર પડ્યો નિજ ધામથી હું ને ઘેરે ઘન અંધકાર

માર્ગ સૂઝે નવ ઘોર રજનીમાં નિજ શિશુને સંભાળ

મુજ જીવનપંથ ઉજાળ

ડગમગતો પગ રાખ તું સ્થિર મુજ દૂર નજર છો ન જાય

દૂર માર્ગ જોવાને લોભ લગીર ના એક ડગલું બસ થાય

પ્રેમળ જ્યોતિ તારો દાખવી મુજ જીવનપંથ ઉજાળ

આજ લગી રહ્યો ગર્વમાં હું ને માગી મદદ ન લગાર

આપ બળે માર્ગ જોઈને ચાલવા હામ ધરી મૂઢ બાળ

હવે માગું તુજ આધાર

પ્રેમળ જ્યોતિ તારો દાખવી મુજ જીવનપંથ ઉજાળ

ભભકભર્યાં તેજથી હું લોભાયો ને ભય છતાં ધર્યો ગર્વ

વીત્યાં વર્ષો ને લોપ સ્મરણથી સ્ખલન થયાં જે સર્વ

મારે આજ થકી નવું

પર્વ પ્રેમળ જ્યોતિ તારો દાખવી મુજ જીવનપંથ ઉજાળ

તારા પ્રભાવે નિભાવ્યો મને પ્રભુ આજ લગી પ્રેમભેર

નિશ્વે મને તું સ્થિર પગલેથી ચલવી પહોંચાડશે ઘેર

દાખવી પ્રેમળ જ્યોતિની સેર

પ્રેમળ જ્યોતિ તારો દાખવી મુજ જીવનપંથ ઉજાળ

કર્દમભૂમિ કળણ ભરેલી ને ગિરિવર કેરી કરાડ

ધસધસતા જળ કેરા પ્રવાહો સર્વ વટાવી કૃપાળ

મને પહોંચાડશે નિજ દ્વાર

પ્રેમળ જ્યોતિ તારો દાખવી મુજ જીવનપંથ ઉજાળ

રજની જશે ને પ્રભાત ઊજળશે ને સ્મિત કરશે પ્રેમાળ

દિવ્યગણોનાં વદન મનોહર મારે હ્રદયે વસ્યાં ચિરકાળ

જે મેં ખોયાં હતાં ક્ષણવાર

પ્રેમળ જ્યોતિ તારો દાખવી મુજ જીવનપંથ ઉજાળ

-નરસિંહરાવ દિવેટિયા

આ પ્રાર્થના ગીત નો વિડીયો નીચે મુક્યો છે .

આ દીપોત્સવી અને નવા વર્ષના ઉત્સવી માહોલમાં હૃદયના ભાવથી ગાયકની સાથે ગાઈએ.

Premal Jyoti Taro | Ishwar Allah Tere Naam |

આભાર અને અભિનંદન

મિત્રો

મને જણાવતાં હર્ષની લાગણી થાય છે કે આજની તારીખે વિનોદ વિહારના માનવંતા મુલાકાતીઓની સંખ્યા 240,187  સુધી પહોંચી ગઈ છે .બ્લોગને નિયમિત રીતે ફોલો કરતા વાચકોની સંખ્યા 297 ની થઇ છે .  

આ સૌ મુલાકાતી મિત્રોનો આભાર માનું છું અને દિવાળી અને નવા વર્ષનાં સૌને અભિનંદન અને નવા વર્ષની હાર્દિક શુભેચ્છાઓ પાઠવું છું.

સૌને સાલ મુબારક

વિનોદ પટેલ

Diwali-Taramandal-2

( 578 ) નવા વર્ષમાં શું નવું કરવા જેવું છે?…. (દૂરબીન)….શ્રી કૃષ્ણકાંત ઉનડકટ

સાપ ગયાને લીસોટા રહ્યા ની જેમ દીવાળી-નવા વર્ષનું પર્વ હમેશની જેમ થોડો સમય જન જીવનમાં ઉત્સાહનાં પુર રેલાવીને ઓસરી ગયું.નવા વરસે કરેલા સંકલ્પો પણ ભુલાઈ ગયા !દરજીનો દીકરો જીવે ત્યાં સુધી સીવે એ કહેવતને યાદ અપાવે એમ સૌ પોતપોતાની જિંદગીની ચીલા ચાલુ ઘટમાળમાં જોતરાઈ ગયાં .

આ વિષય ઉપર જાણીતા વિચારક અને કટાર લેખક શ્રી કૃષ્ણકાંત ઉનડકટએ એમના નીચેના લેખમાં સુંદર જન જીવન અવલોકન રજુ કર્યું છે. સંદેશમાં પ્રગટ એમનો આ પ્રેરક લેખ આજની પોસ્ટમાં વાચકોના આસ્વાદ માટે  અને એના ઉપર મનન કરી અમલ કરવા માટે એમના આભાર સાથે પ્રસ્તુત કર્યો છે.

Krishnkant Unadkat

શ્રી કૃષ્ણકાંત ઉનડકટ

અગાઉ વિનોદ વિહારમાં પ્રગટ શ્રી કૃષ્ણકાંત ઉનડકટના ઘણા ચિંતન લેખો અને પરિચય  આ લીંક ઉપર વાંચીશકાશે .

વિનોદ પટેલ

======================================

નવા વર્ષમાં શું નવું કરવા જેવું છે? : (દૂરબીન) : કૃષ્ણકાંત ઉનડકટ

તહેવારો ગયા અને બધું જ પાછું હતું એનું એ જ થઈ ગયું. એક ફિલોસોફરે સરસ વાત કરી છે કે, આકસ્મિક ઘટનાઓને તો પહોંચી વળાતું હોય છે, રોજિંદી ઘટના જ કંટાળાજનક હોય છે. આપણું જીવન જ જાણે ફિક્સ શિડયુલમાં ગોઠવાઈ ગયું છે. એવું જડબેસલાક થઈ ગયું છે કે તેમાં જરાયે સ્પેસ જ નથી બચતી. સવારે પથારીમાંથી ઊઠવાથી માંડીને રાતે પથારીમાં પડવા વચ્ચેના સમયમાં જિંદગી એકસરખી જ જીવાતી રહેતી હોય છે. માણસની જિંદગીમાં શું હોય છે? સ્ટુડન્ટ્સ માટે સ્ટડી, હાઉસવાઇફ માટે ઘરનું કામ અને બધાની સુવિધા સાચવવાની ચિંતા, જેન્ટ્સ માટે કાં તો ઓફિસ અથવા તો ધંધો. બધાને ગોલ પૂરા કરવા હોય છે. જિંદગી જાણે એક સિલેબસ બની ગઈ છે જે પરીક્ષા પહેલાં પૂરો કરવાનો છે.

નવું વર્ષ આવે ત્યારે કંઈક નવું કરવાની તમન્ના જાગે છે, પણ સમય સાથે આ તમન્ના ક્યાં અલોપ થઈ જાય છે એ જ સમજાતું નથી. વળી, એ જ ફરિયાદો આવવા લાગે છે કે બહુ જ બિઝી રહેવાય છે, મરવાનીય ફુરસદ નથી, પોતાના લોકો માટે પણ સમય બચતો નથી, મારે જે કરવું છે એ કરી જ શકતો નથી. ઘણા લોકોએ નવા વર્ષમાં રિઝોલ્યુશન પાસ કર્યા હશે. અમુકના તો અત્યાર સુધીમાં તૂટી પણ ગયા હશે. ઘણા લોકોએ મુદત પાડી હશે. દિવાળીથી નક્કી કર્યું હતું પણ હવે દેવદિવાળીથી શરૂ કરીશ. આવું બધા સાથે થતું હોય છે, એમાં ચિંતા કરવાની જરૂર નથી. સવાલ એ છે કે તમારી અંદર કંઈ બદલ્યું કે નહીં? નવા વર્ષમાં કંઈ નવું તત્ત્વ ઉમેરાયું કે નહીં?

જિંદગીમાં કંઈ પણ નવું બને ત્યારે કંઈક તો નવું થવું જ જોઈએ. આપણી જિંદગીમાં માત્ર એક દિવાળી વધુ ઉમેરાઈ જાય એ પૂરતું નથી, થોડીક જિંદગી પણ ઉમેરાવી જોઈએ. હા, ફેર થતો હોય છે, પણ એ ફેર લાંબું ટકતો નથી. આપણે જલદીથી પાછા મૂળ સ્થિતિમાં આવી જઈએ છીએ. ફિલ્મ જોઈને નીકળીએ પછી થોડોક સમય એની અસરમાં રહીએ છીએ. કોઈ સારું પ્રવચન સાંભળીએ ત્યારે થાય છે કે વાત તો સાચી છે, જિંદગી આમ જ જીવવી જોઈએ. કંઈક સારું વાંચીએ ત્યારે એને યાદ રાખવાનું નક્કી કરીએ છીએ. કોઈ વળી પુસ્તકમાં ગમતી લીટીની નીચે અંડરલાઇન કરે છે. એ વાત જુદી છે કે પછી આપણે એ પુસ્તક ખોલતા હોતા જ નથી. આવું કેમ થાય છે? કારણ કે આપણે ફટ દઈને આપણી ઓરિજિનલ સ્થિતિમાં આવી જઈએ છીએ. સારા વિચારો બધાને આવતાં જ હોય છે. સુંદર જિંદગીની કલ્પનાઓ બધા સેવતા જ હોય છે, પણ એ વિચારો ટકતા નથી. બીજા વિચારો હાવિ થઈ જાય છે અને આપણે બધા પાછા હતા એના એ જ થઈ જઈએ છીએ!

દિવાળીના તહેવારો પછી સામાન્ય રીતે આપણેે ત્યાં લાભપાંચમથી નવા વર્ષનું કામ શરૂ થાય છે. પાંચમે આપણે શેનું મુહૂર્ત કરીએ છીએ? પાછા હતા એવા જ થઈ જવાનું મુહૂર્ત? ઓફિસમાં રજા પૂરી થઈ એટલે કામ ચાલુ થઈ ગયું. હા, આપણે બધાએ આમ તો રોજેરોજ જે કરતાં હોય એ જ કરવું પડે છે, પણ એમાં કંઈ ચેઇન્જ ન થઈ શકે?

થોડાક હળવા રહેવાનું નક્કી ન કરી શકીએ? હસવાનું થોડુંક વધારી ન શકીએ? આપણે જે કંઈ કરીએ છીએ એ ટેન્શન રાખીને જ કરીએ છીએ. ટેન્શનની એવી આદત પડી ગઈ છે કે આપણને હસવું ફાવતું નથી! આપણને આદત જ નથી હોતી! કામ તો ટેન્શનમાં થાય. આપણે બધું જ ફોર્માલિટી ખાતર કરીએ છીએ. હસીએ પણ ત્યારે જ જ્યારે હસવું પડે છે. હસીશું નહીં તો ખરાબ લાગશે એવું વિચારી આપણે હસવાનું પણ નાટક જ કરતા હોઈએ છીએ. ખડખડાટ હસવું હવે દુલર્ભ થતું જાય છે. લોકો હસવામાં પણ વિચાર કરે છે. હું હસીશ તો લોકો શું માનશે? ઘણા તો એવું પણ માને છે કે હસીશ તો લોકો એવું માનશે કે હું મારા કામ પ્રત્યે સિરિયસ નથી. એવું નથી હોતું.

તમે એવું ઇચ્છો છો કે તમને કામનો થાક ઓછો લાગે? તો કામ કરવાની સ્ટાઇલ બદલાવો. કામ વિશેના વિચારો બદલાવો. કામ તો કરવું પડવાનું જ છે. હસીને કરો કે મોઢું ચડાવીને, ટેન્શન રાખીને કરો કે હળવાશથી, તમારું કામ તમારે જ કરવાનું છે. કામ કેમ કરવું એ તમે તમારી રીતે નક્કી કરો. ઓફિસમાં બે વ્યક્તિ એકસરખું જ કામ કરતી હોય છે છતાં એકનું કામ શ્રેષ્ઠ રીતે થતું હોય છે અને બીજાના કામમાં વેઠ થતી હોય છે. આનું કારણ માણસનો કામ પ્રત્યેનો એપ્રોચ જ હોય છે.

દુનિયામાં એવા કેટલા લોકો છે જે પોતાનું કામ એન્જોય કરે છે. તમે એન્જોય કરો છો? યાદ રાખો, જે કામ એન્જોય કરે છે એને જ સફળતા મળે છે. તમારે સફળ થવું હોય તો કામને એન્જોય કરતા શીખી જાવ. એમાં તમારે બીજું કંઈ જ કરવાનું નથી. માત્ર તમારા વિચારો અને વર્તનમાં જ થોડાક ફેરફાર કરવાની જરૂર છે. નવા વર્ષમાં આ કરવા જેવું છે. માત્ર એટલું નક્કી કરી લો કે હું મારું કામ એન્જોય કરીશ, મારા કામમાંથી છટકીશ નહીં, કોઈ એસ્ક્યુસીઝ શોધીશ નહીં. આપણે મોટાભાગે બહાનાં શોધતા હોઈએ છીએ. આ બહાનાં દ્વારા આપણે આપણને જ છેતરતા હોઈએ છીએ.

નવું શરૂ થવાનું હોય ત્યારે કંઈક નવું અને એકડે એકથી શરૂ કરવાનો વિચાર આવે છે. એક ચિંતકે સરસ વાત કરી કે આપણે નવા માટે કેટલી બધી રાહ જોતા હોઈએ છીએ? નવા વર્ષથી આમ કરીશ, બર્થડેથી તો આવું જ કરવું છે, આ એનિવર્સરીથી આટલું તો ચેઇન્જ થવું જ છે. કોઈ દિવસ ઊગે ત્યારે એમ કેમ નથી વિચારતું કે આજનો દિવસ નવો છે, હવે હું કંઈક નવું કરીશ. દિવસ તો દરરોજ નવો જ હોય છે, તો આપણે દર દિવસે કંઈ નવું ન કરી શકીએ? એટલિસ્ટ સવારે બ્રશ કરતી વખતે આપણું મોઢું મિરરમાં જોતા હોઈએ ત્યારે આપણી જાતને એટલું ન કહી શકીએ કે આજનો દિવસ નવો છે, એટલિસ્ટ હું આજનો દિવસ ગઈ કાલની જેમ જ નહીં જીવું, હું આજની દરેક ક્ષણ એન્જોય કરીશ. મારા કામમાં મન પરોવીશ. બધા સાથે પ્રેમથી વાત કરીશ. આપણે આપણી આજ ઉપર મોટાભાગે તો ગઈકાલને જ સવાર રાખીએ છીએ અને એટલે જ આપણને કોઈ દિવસ નવો નથી લાગતો અને બધા જ દિવસો ચીલાચાલુ અને બોરિંગ લાગે છે.

ફ્રેશનેસ નાની-નાની વાતોથી પણ આવી શકે છે. મજા માત્ર પાર્ટીમાં જ આવે એવું નથી, મોટાભાગની મજા નાની-નાની ઘટનાઓ અથવા અમુક હળવી પળોમાં આવતી હોય છે. આપણે દર વખતે મોટિવેશનનું માહાત્મય ગાયા રાખીએ છીએ. હંમેશાં બહારથી અને બીજા પાસેથી મોટિવેશનની અપેક્ષા રાખીએ છીએ. આપણે પોતે ક્યારેય આપણા મોટિવેટર બનીએ છીએ ખરાં? તમે એવું વિચારો છો કે હું જે કંઈ કરું છું એ મારા માટે કરું છું. નોકરી કરનારા મોટાભાગના લોકો એવું જ વિચારતા હોય છે કે હું તો કંપની માટે કામ કરું છું.

જે લોકો પોતાના માટે કામ કરે છે એ જ આગળ વધી શકે છે. પગાર સાથે કામની સરખામણી કરીને કામ કરતા લોકો પણ દુઃખી થતા રહે છે. પગાર ચોક્કસપણે મહત્ત્વનો છે, પણ પગારની અસર તમારા કામ પર ન થવા દો. એક એડ આવતી હતી કે, ઇતને પૈસે મેં ઇતના હી જ મિલેગા… આવો એટિટયૂડ સરવાળે આપણી ક્ષમતા જ ઘટાડતો હોય છે. આપણે આગળ વધવું હોય છે, સફળ થવું હોય છે, પણ આપણો એટિટયૂડ અને એપ્રોચ બદલવો હોતો નથી. પરીક્ષા આવે ત્યારે જ આપણને એમ થાય છે કે પહેલેથી મહેનત કરી હોત તો સારું હતું, ત્યારે એવું પણ નક્કી કરીએ છીએ કે નવી ટર્મ શરૂ થાય એટલે પહેલેથી જ બધી તૈયારીઓ કરવા માંડવી છે, પણ નવી ટર્મ શરૂ થાય ત્યારે એવું થતું નથી. નવા વર્ષે પણ મોટાભાગે એવું જ થતું હોય છે!

આપણે આપણા ચોકઠામાંથી જ બહાર નીકળતા નથી. ઓફિસ કે બિઝનેસના સ્થળે જવાનો રસ્તો પણ આપણે બદલતા નથી,ઓફિસમાં ગયા પછી પણ આપણે મેકેનિકલી એક જ રીતે કામ કરતા હોઈએ છીએ. જરાકેય કંઈ આઘુંપાછું થાય તો આપણાથી સહન થતું નથી. આપણે જરા અમથો ફેરફાર પણ સહન કરી શકતા નથી અને ઇચ્છા રાખીએ છીએ જિંદગી બદલવાની! કંઈ બાંધછોડ જ કરવી ન હોય તો કંઈ છે બદલવાનું કેવી રીતે?

નવા વર્ષમાં બીજું કંઈ ન કરીએ તો કંઈ નહીં, માત્ર વિચારોમાં થોડોક બદલાવ લાવીએ. થોડાક વધુ સારા વિચારો કરવાનું નક્કી કરીએ, થોડાક ખોટા અને ખરાબ વિચારો ટાળવાનો પ્રયાસ કરીએ, હું જે કંઈ કરીશ એને એન્જોય કરીશ અને જે કંઈ કરીશ એ મારા માટે કરતો હોય એવી રીતે કરીશ, થોડુંક હસવાનું વધારીશ અને ફરિયાદ કરવાનું ઘટાડીશ, નવા મિત્રો બનાવીશ અને બધા સાથે નમ્રતાથી વર્તીશ, કોઈને ખોટી રીતે સારું નહીં લગાડું અને કોઈનું ખોટું નહીં લગાડું. આ બધા જ રિઝોલ્યુશન બહુ સહેલા છે,કોઈ વ્યસન છોડવા જેટલા અઘરા નથી. વ્યસન છોડવાનું રિઝોલ્યુશન એટલે છૂટતું નથી કારણ કે એ આપણને સતત યાદ આવે છે, ક્રેવિક થાય છે, આપણું બોડી ડિમાન્ડ કરે છે અને આ બીજા રિઝોલ્યુશન એટલે ટકતા નથી, કારણ કે આપણે એ યાદ રાખતા નથી, ભૂલી જઈએ છીએ. ઘણા લોકો નોટિસ બોર્ડ પર સુંદર પીન મારીને અમુક સુવાક્યો અને નિર્ણયો લખી રાખે છે, પણ એ બધા નોટિસ બોર્ડને બદલે દિલમાં રહેવા જોઈએ. સારું હોય તેને યાદ કરતું રહેવું પડે છે. વધારે નહીં તો થોડોક તો બદલાવ લાવો,થોડો થોડા બદલાવ તમને ક્યારે આખા ને આખા બદલી નાખશે એની તમને ખબર જ નહીં પડે! તમે ચાલવાનું શરૂ કરો, મંજિલ તો નજીક ને નજીક આવતી જ રહેવાની છે.

 kkantu@gmail.com

સૌજન્ય–આભાર …સંદેશ .કોમ ….શ્રી કૃષ્ણકાંત ઉનડકટ

Source-  http://www.sandesh.com/article.aspx?newsid=3002940

( 562 ) નવા વર્ષે,નવેસરથી, નવલા થઈએ –દીપોત્સવી અંક ભાગ-૪

પ્રિય વાચકમિત્રો.

New year

મનુષ્યના જીવનનું અને સમયનું ચક્ર સદા ફરતું જ રહે છે, ફરતું જ રહે છે  .ભીત ઉપર નવા વર્ષનું કેલેન્ડર ટીંગાઈ જાય છે .એક પછી એક કેલેન્ડરનાં પાનાં બદલાતાં રહે છે.

આમ જોવા જઈએ તો નવા વર્ષમાં અને જુના વર્ષોમાં સમયની દ્રષ્ટીએ કોઈ ફેર નથી .નવું વર્ષ એ ફક્ત કેલેન્ડરની કમાલ છે.પરંતુ માણસને કૈક નવું નવું કરવાનું મૂળભૂત રીતે ગમે છે.એટલા માટે વર્ષના એક સમય ગાળાના એક ભાગને કોઈ ધાર્મિક ઉત્સવ સાથે જોડીને એને હર્ષથી ઉજવવાની જુદી જુદી રીતો એણે શોધી કાઢી છે.

હિન્દુ ધર્મમાં એ રીતે વર્ષના એક ભાગને દિવાળી અને બેસતું વર્ષ એમ નામાભિધાન કરીને દીવાઓ, ફટાકડા ,સ્વાદિષ્ટ મીઠાઈ,હળવું, મળવું, મ્હાલવું, એક બીજાને શુભેચ્છાઓની આપ-લે કરવી એમ વિવિધ રીતે જન સમાજ આનંદ અને ઉત્સાહની અભિવ્યક્તિ કરે છે. આવો આનંદ અને ઉત્સાહ આખું વર્ષ ટકી રહે તો કેવું સારું !

હિંદુ ધર્મમાં જેમ દિવાળી-બેસતા વર્ષનો મહિમા છે એમ ખ્રિસ્તી ધર્મમાં ક્રિસમસ-ન્યુ યર નું પર્વ આવો જ ભીતરમાં સુસુપ્ત રીતે પડેલા ઉત્સાહ અને ઉલ્લાસને બહાર લાવી નવીનતાનો અહેસાસ કરવાનું સાર્વજનિક પર્વ છે.

પ્રશ્ન એ છે કે વર્ષ તો બદલાયું પણ આપણે બદલાયા છીએ ખરા ! ગત વર્ષોના અનુભવોમાંથી આપણે કઇંક શીખ્યાનો અહેસાસ કરીએ છીએ ખરા ?નવું વર્ષ આવે એટલે સ્વાભાવિક રીતે મનમાં નવા નવા સંકલ્પો કરવાનો મનમાં ઉમંગ જાગે છે .

Mahendra shah cartoon- New year resolutions

પ્રસંગોચિત આવા મનોવિચારોમાંથી સર્જાએલ નવા વર્ષના સ્પીરીટને ઉજાગર કરતી

મારી એક સ્વ-રચિત અછાંદસ  કાવ્ય રચના નીચે પ્રસ્તુત છે .

નવા વર્ષે,નવેસરથી, નવલા થઈએ

સમય સરિતા હંમેશ વહેતી જ રહેતી,

જૂની યાદો પાછળ મૂકી વર્ષ એક થયું પસાર

આવી ઉભા એક નવા વર્ષને પગથાર.

જિંદગી આપણી છે એક ફળદાઈ ખેતર,

એમાં ઊગેલ ઘાસ નીદામણ દુર કરીને,

નવા વરસે પ્રેમનો નવ પાક ઉગાડીએ.

ખામીઓ, કમજોરીઓ હોય એ દુર કરીએ

નકારાત્મકતા છોડીને ,સકારાત્મક બનીએ.

નવા વરસે નવ નિર્માણનો સંકલ્પ કરીને,

નવલા વરસે નવલા બનીને ,નવેસરથી,

નવું વર્ષ હળીમળી પ્રેમથી સૌ ઉજવીએ,

નવી આશાનો દીપ જલાવીએ,પ્રકાશીએ.

કૃપાળુ પ્રભુને હંમેશાં હર પળ સમરીએ,

નવ વરસે, બે કર જોડી એને પ્રાર્થીએ કે ,

રિદ્ધિ, સિદ્ધિ,લક્ષ્મી અને સરસ્વતી માતા ,

સૌ પર રીઝે ,સુખ શાંતિ સૌ પ્રાપ્ત કરે ,

એવું ઉત્તમ નવું વર્ષ બનાવજે, હે પ્રભુ.

મારી એક બીજી રચના 

ભલાઈની પરંપરા

જિંદગી આપણી આ દેવની દીધેલ એક અણમોલ ભેટ સમાન છે,

વેડફી ના દેતા એને એવા કાર્યોમાં જેમાં માત્ર તમારો જ સ્વાર્થ છે,

અન્યો માટે પણ ભલાઈ બતાવીને નિસ્વાર્થ સેવા સદા કરતા રહો,

સદા હસતા રહો , હસાવતા રહો અને પ્રેમની ગંગા વહાવતા રહો.

 

તમારા માટે નાનું કે મોટું ભલાઈનું કામ કોઈ કરે એવા સમયે તો

એના બદલામાં ભલાઈનું કાર્ય કરીને ઋણ ચૂકવવાનું ભૂલશો નહીં .

તમે કરેલ ભલાઈનું આ ચક્ર ફરતું ફરતું તમારી પાસે જરૂર આવશે,

તમારી સેવા પરોપકારની આ પરંપરાથી જીવન ધન્ય બની જશે .

 

દરેક જણ જો સમજીને નાનું સરખું પણ જો ભલાઈનું બી વાવશે તો પરિણામે આ

સમાજરૂપી બગીચામાં સરસ મજાની ફૂલવાડી ખીલી ઉઠશે .

ચાલો, નવા સંવત વર્ષ ૨૦૭૧ નું હૃદયમાં હર્ષ,નવા ઉત્સાહ અને ઉલ્લાસથી સ્વાગત કરીએ .

ગત વરસોમાં વિનોદ વિહારને આપ સૌ મિત્રો તરફથી જે સુંદર સહકાર મળ્યો છે એ બદલ આભાર વ્યક્ત કરી નવા વરસે પણ એથી વધુ  સહકાર મળતો રહેશે એવી આશા રાખું છું.

આજથી શરુ થતું નવું સંવત વર્ષ આપ સૌને સુખ, સફળતા ,તંદુરસ્તી ,આનંદ,સમૃદ્ધિ અને સંતોષ આપનારું સુંદરત્તમ વર્ષ બની રહે તેવી મારી અનેક હાર્દિક શુભ કામનાઓ છે .

HAPPY NEW YEAR — HAPPY NEW YOU

સાલ મુબારક

વિનોદ પટેલ

===========================

You did not choose your date of birth,
Nor do you know your last,
So live this gift that is your present,
Before it becomes your past.
–Linda Ellis

===========================

ફેસ બુક પાનાઓમાંથી પ્રાપ્ત કેટલીક પ્રસંગોચિત સામગ્રી.

જુઓ, શ્રી રઈશ મનીઆર નવા વર્ષ માટે શું કહે છે :

સહુ મિત્રોને સાલમુબારક કહેવાનું આ માત્ર એક નિમિત્ત છે, બાકી જીવનને વર્ષોમાં વહેંચી શકાતું નથી. અને જીવનને માત્ર ઉત્સવોની આંખે જોઈ શકાતું નથી. છતાંય જીવનમાં આંતરિક અને બાહ્ય સંઘર્ષમાં રત પ્રત્યેક વ્યક્તિ, પોતાની અંદર રહેલ શુભને વેગ આપવા માંગતી પ્રત્યેક વ્યક્તિ વર્ષ બદલાય ત્યારે હૌસલા અફઝાઈનો, પ્રોત્સાહનનો હકદાર હોય છે.

વીતેલા વરસને પ્રેમપૂર્વક વિદાય આપીએ અને એક સૌમ્ય નૂતનવર્ષની અપેક્ષા રાખીએ.

ઉમીદોનો મનમાં નવો ફાલ આવે

ખુશી આંગણે ઝૂમતી ચાલ આવે

આ જીવતર ઉપર કંઈ નવું વ્હાલ આવે

એ રીતે તમારું નવું સાલ આવે

આજ મુબારક..કાલ મુબારક

સૌને અમારું વ્હાલ મુબારક

મળે કોઈને ના ઝખમ કોઈ બીજો

ક્ષમાથી ઊંચો ના ધરમ કોઈ બીજો

સમયથી ન સારો મલમ કોઈ બીજો

નવો દિન ગુલાબી લઈ ગાલ આવે

એ રીતે તમારું નવું સાલ આવે

આજ મુબારક..કાલ મુબારક

સૌને અમારું વ્હાલ મુબારક

અનુભવ નિરંતર ઘડે મિત્ર તમને

નિરાશા કદી ના અડે મિત્ર તમને

પરિશ્રમનું ફળ સાંપડે મિત્ર તમને

સકલ લાભ શુભ યોગ તત્કાલ આવે

એ રીતે તમારું નવું સાલ આવે

આજ મુબારક..કાલ મુબારક

સૌને અમારું વ્હાલ મુબારક

નવા સાલમાં પહેલા જેવા ન રહેશો

નવા સાલમાં કૈંક સંકલ્પ લેશો

નવા સાલમાં ભોળપણથી પ્રવેશો

જે રીતે જગતમાં નવું બાલ આવે

એ રીતે તમારું નવું સાલ આવે

આજ મુબારક..કાલ મુબારક

સૌને અમારું વ્હાલ મુબારક

રઈશ મનીઆર

==================

ભક્ત રણછોડ એમના આ પ્રેરક પદમાં દિલનો દીવો કરવાનું ઈજન આપે છે

એમને પણ સાંભળો :

થયું ભો મંડળમાં અજવાળું રે

દિલમાં દીવો કરો રે, દિલમાં દીવો કરો.
કૂડા કામક્રોધને પરહરો રે…દિલમાં
દયા-દીવેલ પ્રેમ-પરણાયું લાવો,
માહા સુરતાની દિવેટ બનાવો,
મહા બ્રહ્મ અગ્નિ ચેતાવો રે…દિલમાં
સાચા દિલનો દીવો જ્યારે થાશે,
ત્યારે અંધારું સૌ મટી જાશે,
પછી બ્રહ્મ લોક તો ઓળખાશે રે…દિલમાં
દીવો અનભે પ્રગટે એવો,
તનનાં ટાળે તિમિરના જેવો,
એને નયને તો નીરખીને લેવો રે… દિલમાં
દાસ રણછોડે ઘર સંભાળ્યું,
જડી કૂંચી ને ઉઘડ્યું તાળું,
થયું ભો મંડળમાં અજવાળું રે…દિલમાં
રણછોડ

=======================

શ્રી પ્રકાશ ગજ્જર અને હું એક જ માતૃ સંસ્થા સર્વ વિદ્યાલય- કડીના જુના વિદ્યાર્થીઓ છીએ. વિદ્યાર્થીકાળથી  જ તેઓએ સાહિત્ય સર્જન શરુ કર્યું છે. આધ્યાત્મિક ચિત્તવૃત્તિ ધરાવતા મારા આ ફેસ બુક મિત્ર એમના પ્રેરણાદાયી-Motivational – સાહિત્યથી ખુબ જાણીતા છે.

નવા વર્ષની શરૂઆત મિત્ર શ્રી પ્રકાશ ગજ્જર લિખિત નીચેની  સુંદર પ્રાર્થનાથી કરીએ .

સર્વશક્તિમાન પરમાત્માની સર્વદર્શી આંખ સદાસર્વદા મારી સંભાળ રાખી રહી છે ને મારા ઉપર સતત અમીવર્ષણ કરી રહી છે. એનો પરમ શક્તિશાળી હાથ – જે બ્રહ્માંડના કોઈપણ ખૂણે પહોઁચીને ગમે તે કાર્ય સાવ સરળતાથી કરી શકે છે તે – મારી પાસે છે, ઉપર છે, નીચે છે, આસપાસ છે. એ સતત મારૂં રક્ષણ કરે છે. પછી ચિઁતાની શી જરૂર? હું સાવ નચિઁત છું, સુરક્ષિત છું, પ્રભુની શક્તિથી પ્રેરાયેલો છું.

હે પ્રભુ! જે ઘટનાઓ બનવાની છે તે સહન કરવાની શક્તિ આપો. દુઃખોમાં અડગ રહીએ, ગુસ્સો આવે ત્યારે શાંત રહીએ અને ભાગ્યના ભયંકર પલટા સાથે આસમાની-સુલતાની થઈ જાય ત્યારે છેક મૃત્યુના દ્વાર સુધી પણ પરસ્પરને વફાદાર અને પ્રેમભર્યા રહીએ એવો અનુગ્રહ કરો.

પારસ-પ્રાર્થના, જનકલ્યાણ, જુલાઈ ૧૯૯૫, પૃ. ૩૩

કેટલીક ગમતી કાવ્ય ક્ન્ડીકાઓનો આસ્વાદ

 

છોડ દીવાને પહેલાં તું મને પ્રગટાવને,

આવવા તૈયાર છું, રસ્તો જરા બદલાવને.

– અનિલ ચાવડા

~~~~

છો વેદ વાંચનારાને માનહાનિ લાગે

પ્રસ્વેદ પાડનારા અમને તો જ્ઞાની લાગે

– રઈશ મનીયાર

~~~~

હમણાં કશું લખાતું નથી એવું કેમ છે ?

ખુદને મળી શકાતું નથી એવું કેમ છે ?

– મેગી અસનાની

~~~~

ક્યારેક સારો લાગે ક્યારેક નરસો લાગે

તોયે માણસ મને હૈયાસરસો લાગે

– સુરેશ દલાલ

~~~~

શબ્દોમાં ક્યાં સમાય છે તારી ને મારી વાત ?

અર્થોમાં ક્યાં ચણાય છે તારી ને મારી વાત ?

– રમેશ પારેખ

~~~~

( 560 ) “આપણે સ્વચ્છ તો ભારત સ્વચ્છ ” …. લેખક- શ્રી હરનીશ જાની

આજની ઈ-મેલમાં ,સુરતના આદરણીય મિત્ર શ્રી ઉત્તમભાઈ ગજ્જરે જાણીતા ડાયસ્પોરા હાસ્ય લેખક શ્રી હરનીશભાઈ જાનીએ સુરતના અખબાર ગુજરાત મીત્રની દર્પણ પૂર્તિમાં શરુ કરેલ મર્માળી કૉલમ ‘ફીર ભી દીલ હૈ હીન્દુસ્તાની’ માં તારીખ 22મી ઓક્ટોબરે પ્રગટ એક વધુ લેખ “આપણે  સ્વચ્છ તો ભારત  સ્વચ્છ “ ની પી.ડી.એફ. ફાઈલની લીંક  મોકલી આપી છે .

લેખક શ્રી હરનીશભાઈ અને ઉત્તમભાઈના આભાર સાથે આ લેખને આજની પોસ્ટમાં વાચકો માટે પ્રસ્તુત કરતાં આનંદ થાય છે  .

આ લેખમાં એક જગાએ લેખક કહે છે :

“મોદીજી કહે છે કાંઈ અને લોકો સમજે છે કાંઈ .  યાદ છે ને થોડા વખત પહેલાં એમણે” વાંચે ગુજરાત  “ની ઝુંબેશ સાથે ” તરે ગુજરાત “ની ઝુંબેશ ચાલું કરી હતી જેમાં એક જણ પુસ્તક વાંચી લે કે બીજાને આપે.આમ પુસ્તક તરતું રાખવાનું હતું. ત્યારે કેટલીક સ્કુલોમાં પ્રિન્સીપાલો પુસ્તકને પ્લાસ્ટીકમાં વીંટીને પાણીની ડોલમાં તરાવવા પ્રયત્ન કરતા હતા ,  “ક્યાંકી  મોદી સાહેબને કહા હૈ !”

દીપોત્સવીના આ સપરમા દિવસોમાં આ લેખમાં હરનીશભાઈના મનોરંજક હાસ્યના ફટાકડા,  ફૂલ ઝરીયો અને તારામંડળનો આનંદ લુંટવા તમારે નીચેનો લેખ વાંચવો જ રહ્યો.

 તારીખ ૨૨મી  ઓક્ટોબર, ૨૦૧૪ ના રોજ જાણીતા અખબાર ગુજરાત મિત્રની દર્પણ પૂર્તિમાં પ્રગટ   આ રહ્યો એમનો એ મજાનો લેખ.

Clean india -modi

 

“આપણે સ્વચ્છ તો  ભારત સ્વચ્છ ” લેખક -હરનીશ જાની 

આ અગાઉ વિનોદ વિહારની આ પોસ્ટ ( 554 ) શ્રી હરનીશ જાની અને એમની ગુજરાત મિત્રમાં શરુ થયેલ મર્માળી કૉલમ ‘ફીર ભી દીલ હૈ હીન્દુસ્તાની’  માં ગુજરાત મિત્રમાં શરુ થયેલ મર્માળી કૉલમ ‘ફીર ભી દીલ હૈ હીન્દુસ્તાની’ માં હરનીશભાઈના પ્રથમ ચાર લેખો સંપાદિત કર્યા હતા  .

આ બધા લેખોને વાચકોને એક જગાએ વાંચવામાં સરળતા રહે એટલા માટે ફરી એક વાર નીચે પ્રસ્તુત કરેલ છે.નીચેની પી.ડી.એફ ફાઈલની લીંક ઉપર ક્લિક કરીને એને  વાંચી શકાશે. આનંદો.

તારીખ ૨૩મી સપ્ટેમ્બર, ૨૦૧૪ નાં રોજ શુભ શરુઆતનો પ્રથમ લેખ  

હરનીશ જાની- ગુજરાત મિત્રની કોલમમાં પ્રથમ લેખ ‘આ અમેરીકા; આ NRI’

તારીખ ૧લી ઓક્ટોબર, ૨૦૧૪ના રોજ પ્રગટ બીજો લેખ .

૨. દાને દાને પે લિખા હૈ  -હરનીશ જાની

તારીખ ૮મી ઓક્ટોબર, ૨૦૧૪ના રોજ પ્રગટ ત્રીજો લેખ

૩.‘બાપા કરે તે યોગ અને બાબો કરે તે યોગા !..’

તારીખ ૧૫મી ઓક્ટોબર, ૨૦૧૪ના રોજ પ્રગટ ચોથો લેખ
આ લેખમાં ભારતના હાલના વડા પ્રધાન શ્રી નરેન્દ્ર મોદી વિષે વાત કરવામાં આવી છે .

૪. ‘ખાતો નથી, ખાવા દેતો નથી..’ હરનીશ  જાની

 

==================

“The most beautiful thing is to see a person smiling 

and even more beautiful, 

is to know that you are the reason behind it”

 

Keep smiling in the New Year and always,

and keep giving your comments,

with a big smile ,of course !

સૌ સુજ્ઞ વાચકોને ફરી ફરી નુતન વર્ષાભિનંદન-સાલ મુબારક